قصص قصيــرة

قصص قصيرة

في واقع الحال
وقفــت في طابور طويل من اجل تقديم شكواها الى الموظف الذي ينظر الى الواقفين من تحت عويناته بتعال..
وكان يجيب عليهم باقتضاب وكانهم يريدون ان يفرغون ما في جيبه من نقود قالت: لقد نسى هذا الموظف انه كان يعاني ما عانيناه..
خرجت من المركز الصحي وهي تحمل بيدها وليدها ووصفة طبية عليها ان تشتريها من الصيدلية خارج المركز الصحي وبحثت في محفظة يدها فلم تجد غير خمسمئة دينار وهي اجرة الباص.. فعادت بصغيرها الى البيت وقررت ان تجعل من الوصفة (حرزا) يشفى وليدها من المرض..
صادفني وهو مسرعاً وسالته : خير ان شاء الله فاجابني: من اين ياتي الخير..
فقلت: ماذا هناك..؟ فقال بعصبية: ماذا دهاك الم تسمع بالانفجارات، فقلت: بلا سمعت.. فقال: تعال معي نبحث عن اولادنا..
قالت لصديقتها وهي تضحك من كل قلبها: والله اني خايفة احسد نفسي هم اتخرج واتعين وانخطب في شهر واحد.. احنه ما نعرف السعادة,.. لان الفرحة ماتت بكلوبنة..
صادفه بالمقهى وامسك به وهو يصرخ: موعيب عليك متنطيني فلوسي صار شهرين واني انتظرك.. والاخر محرج ويعتذر منه لسوء حاله وظرفه القاسي ويترجاه ان يصبر عليه قليلاً.. الا ان ذلك الرجل لا يسمع منه وما يقوله وبقى يصرخ وبكلمات بذيئة.. حتى وقف بينهما شيخاً كبيراً وابعدها عن بعض..
وقال له ان لم يكن معه ما يعطيك.. كيف تطالبه ان يعطيك الا تعلم ان الامام جعفر الصادق (ع) قال: لا دين لمن لا مروءة له.. فاذهب يا ولدي ودينك يصل باذن الله..
قالت لزوجها: صدك انت تحبني.. فقال لها : اموت عليج شعندي غيرج، فقالت: اشو اني مدا احس انت تحبني، فقال لها: وشلون تريدين اخليج تحسين اني احبج، فقالت : غير تشتريلي كلادة تراجي محبس حته احس انت تحبني، فقال لها: حبيبتي اني هسة احبج بالبرازيلي ومن الله يمكني احبج بالخليجي..
بعـــــض النـــاس ممن لا ضمير عندهم، اخذوا يحققون اغراضهم العدائية مع بعضهم البعض بطرق بعيدة عن كل القيم والاخلاق والاعراف.. فيلجاون الى التهديد بواسطة الاوراق على انها من جهة معينة.. وهم بذلك يفعلون اساءتين الاولى للشخص المعني والثانية للجهة المتهمة.. حبذا لو يكون هناك ردعا وقرصة اذن لمثل هؤلاء الذين لا ضمير لهم..
سمعتها تقول لأمرأة تسير معها : خية ليش ما نروح انسجل بهاي محو الامية يكولون ينطون فلوس كلمن يسجل بيه، فاجابتها الاخرى: هاي شبيج خية شنو بعد ما شاب ودوه للكتاب فردت عليها قائلة: شنسوي اكلها الفلوس اللي ينطونه اياهه ندفعها للمولد ونخلص من هذا الضيم، فاجابتها الثانية: اي والله صدك..
قالت : خية بلا حسد متكليلي ام دريد منين هذا الخير اللي نزل عليهه.. فاجابتها الاخرى قائلة: خية غير مولات.. فقالت الاخرى: جا حته هاي ثقفوهه شالوا الباء وخلوا ميم.. انوب كاموا يسموهه .. مولات.. صدك لو كالوا ديمقراطية..
صبياً يحمل وصفة طبية في تقاطع 14 رمضان ويقول لاصحاب السيارات: عموا اريد اشتري دوة مال صرع ساعدوني..
وصادف وان كنت في سيارة اجرة ونظرت الوصفة فوجدتها صحيحة دواء للصرع وقيمته (89) الف دينار.. الله يكون في عون الفقراء والمحتاجين..
قال الطبيب للمريض بعد فحصه : تحتاج الى عملية مستعجلة فتعال للمستشفى حتى نكمل فحوصاتك ونسويلك العملية بالجناح الخاص، فرد المريض: دكتور ليش متكدر اسويلي العملية بالعام.. الطبيب: ليش لا بس لازم تنتظر خمسة ستة شهور الى ان يوصلك السرة..
قالت: لازم احصل منه على فصل عشائري: حته يردع.. وسالتها صديقتها: ليش هوة اسوة فقالت: مخبلني كل ساعة مخابرني.. احبج.. اموت عليج.. اني ما اكدر بلياج.. اني لازم اشوفج.. فضحكت صديقتها.. وقالت: هاي مو مشكلة لا تجاوبية واحجبي رقمة وانتهت المشكلة: بعد لويش الفصل العشائري.. ويجوز هوة يحبج صدك .. فقالت:دسكتي خلي انحصل منهم جم فلس.. فاجابتها صديقتها: صدك لو كالوا هذا رزق المعثرات..
م مؤيد آفة ما ان تكون الفلوس بيدها حتى تبخرت ما بين الازياء والمكياج والصالون.. واذا افلست جمعت كل ما اشترته بالاف الدنانير وتبيعه لجارتهم الدلالة بخمسة الاف.. ناس تضحك على ناس..
جلس وقال لزوجته ام نور: اسمعي اريدج تبيعين كل هذا الزاهي والصابون على البيوت واني راح اروح اجمع الاقساط واروح للسوك اسوك.. ديري بالج لتصرفين من الفلوس لا كل يوم لا عفتلج الف الفين.. فاجابته بعصبية: يعني تريدني من الصبح للمغرب على لحم بطني حتى لو سيارة هم يرادلهه بانزين..
فعاد ليقول: يلله يلله لطوليهه اخذي بس الف.. لعد شلون انصير اوادم..
وقف امام الباب وهو يصرخ بامراة عجوز: يلله هسه اريد الايجار، فقالت له العجوز وبصوت متعلثم: ابني اصبر فد يومين وانطيك الايجار.. فقال: لا ما صبر هسه اريد الايجار، وعادت تتوسل به العجوز دون فائدة فتدخل جارها الذي كان يسمع حوارهما:
وقال: اخي مو مشكلة اذا صبرت يومين ما ا عتقد انته باقي بلا عشة فقال صاحب الدار: اهو احنة شلون بهاي الفلسفات.. وركب سيارته رباعية الدفع وهو يقول: دا اشوف بعد يومين واجي واذا ما كو الايجار اعرف شسوي.
محمد عباس اللامي – بغداد

التعليقات
الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

شاهد أيضاً

إغلاق
زر الذهاب إلى الأعلى
WP2Social Auto Publish Powered By : XYZScripts.com
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock