المرحلة الأولى (( مسابقة عريس المنتدى ))

[فـارس]

السلام عليكم
ولكل مين حابب يعرف ئصتي هي هي وبس :10: :10:
البنت يلي لح احكيلكون عنها هي رفيئيتي ونحن منعرف بعض من فترة وانا من زمان بحبا بس ما عرفت كيف بدي صارحها بحبي لانو لما بتجيني الجرأة بتكون هي مع رفئاتا يعني بخجل حاكيها ولما ما عدت بئدر خبي حبي اكتر من هيك طلبت شوفا لحالها بالحديئة مشان حاكيها بموضوع مهم ...
وبهداك اليوم انا لبست متل الاخ هاد :

وحطيت عطر من احسن شي
واهتميت باناقتي كتير وفرشيت سناني و..الخ


وابل ما روح ع الحديقة مريت على محل ورود ونئيتلها احلى بائة ورد

وكملت طريئي
وطبعا انا وصلت ابل الوئت بشوية يعني مو حلوة توصل هي وما تلائينئ واكيد كنت طافي الموبايل لانو ما بدي حدا يزعجني بها اللحظة المهمة .
ونطرتا شوية ولا شفتها جاية هي ورفيئتها ئمت ئلت لحالي لعمى شو جابة هي انا مو ئلتلها تجي لحالها ....
المهم شفتون جايين باتجاهي وهنن عم يحكو ويضحكو لما ئربو عليي افترئو عن بعضون واجت المحروسة لعندي ورفيئتها راحت اعدت بعيد عننا
المهم المحروسة سلمت علي وسلمت عليها وصرنا نتمشى وسالتا كيفك شو اخبارك ردت بانها تمام .. المهم لما وصلنا على زاوية مختفية ورا الشجر وبعيده عن الانظار وئفنا وئلتلها انا حابب حاكيكي بموضوع مهم كتير وبتمنى تسمعيني عل آخر :10::10:
ئلتلي تفضل بصوتها الناعم الظريف وهي مبتسمة ئمت انا طلعت بعيونا وحسيت كأنها بتعرف شو بدي احكي وهاد الشي كتير ساعدني وعطاني الجرءة فئلتلها ..
*** نحنا رفئات من فترة منيحة و....
منعرف بعض منيح و.... طبعا انتي بنت ظريفة وحبابة و.... وانا هيك يعني ... يعني بالفترة الاخيرة عم حسك غير و...
و.. صاير عم اشتئلك اي عم اشتئلك ( وهون هي ابتسمت واحمر وشا وطلعت بالارض )
فكملت انا : وعم فكر فيكي كتير ..... و ما عم بئدر طالعك من بالي .. :10: :10:
و.. عم انبسط كل لما شوفك
يعني بصراحة ..
انا بحبك :10::10::10::10::10::10: اي بحبك :10::10::10: يا ضرسانة بحبك وما فيني خبي عنك اكتر من هيك ويا ريت ما تزعلي مني لانو والله مو بئيدي و ...بتمنى تئبلي مني هلبائة وانا اسف اذا فاجئتك بس والله هي الحئيئة
واهم شي اني ما كون ازعجتك او دايئتك بكلامي وانا اسف مرة تانية .
وهون هي طلعت فيي ورجعت نزلت راسها وهي عم تبستم ووشا احمر متل البندوراية :10::10::10::10: ومو عرفانة شو بدا تحكي :10::10::10::10:
بعدين رحنا تمشينا وراحت هي لعند رفيئتا عم تضحك ولما شافتا رفيئتا صارت هي كمان تضحك وطلعت فيي ورفعتلي ايدا عم تودعني والضحكة على وشا وانا رفعتلها ايدي وانا مبسوط كتير وحسيت باحساس ما بينوصف يعني فرحان على خايف على ما بعرف شو وانا عم فكر بللي صار ابل شوية وانتظرت لما راحو وبعّدو ورحت على البيت .
وهيك كان الموعد الاول :10: :10::10: :10:
:10:

:10::10::10::10::10::10::10::10::10:
:10::10::10::10::10::10::10::10::10::10::10::10::10::10:
:10::10::10::10::10::10::10::10::10::10::10::10::10::10::10::10::10:



وهي رابط موضوعي بمنتدى نفحات اسلامية
بعنوان اسلم على يد نملة :
http://albailassan.com/vb/showthread.php?p=242521#post242521

وهي موضوعي في منتدى الطب والصحة
بعنوان الاسعافات الاولية :
http://albailassan.com/vb/showthread.php?p=242525#post242525
​

 

[§ أبو المر §]

:19::19::19::19::19::19::19::19:

حسام الحلبي ماعم صدق انا :19::19::19::19:

 

[حسام الحلبي]

تحية بيلسانية للجميع رح أكيلكن كيف كان اللقاء اللقاء الأول يلي اعترفت فيه للبنت يلي بحبها عن مشاعري وبنفس الوقت طلبت ايدها بس قبل ما أحكي لازم تعرفوا شغلى كتير مهمة أنو هالقصة واقعية 100 % وبالفعل صايرا معي وماخترعتها منشان هالموضوع

المهم اتفقت معها عن طريق الأيميل أنو نجتمع الساعة 10 صباح يوم الخميس 26 / شباط / 2009
وكان أخر حديث بينا قبل الموعد بثلاث أيام يعني مساء يوم الأحد لذلك من صباح يوم الأثنين وأنا بشغلي عم فكر شو لازم ألبس لأنو شي بحير رجعت المسا وبحبشة بخزانتي ومالقيت شي يليق بهيك مناسبة مو أنو في أشياء كتير حلو بس احترت لذلك انزلت مباشرة على محل ( غناج ) بباب توما ونقيت شي حسيتو مناسب وهي الصورة ( طبعا متل هيك تقريبا كنت لابس وأكيد هي مو ثورتي أنا أحلى )

خلصنا من أول شغلة ضل الهدية لقاء التعرف السابق قدمتلها وردة بيضا لذلك مو معقول أرجع قدملها الورد لذلك بعد تفكير يوم كامل مساء يوم الثلاثاء انزلت على محل هدايا كمان بباب توما وجبت هدية مناسبة وهي بالصورة الهدية

وأخيرا أجت ساعة الصفر واستيقظت باكرا أو بصراحة مانمت ليلتها وأنا ع فكر بمقدمة مناسبة المهم عملتلي دوش ماكن لأنو بالمعتداد أنو عندي دوش صباحي ( استحمام ) طلعت لبست التياب الجديدة حطيتي عطري المفضل ( هوغو بوس ) وانطلقت لمكان اللقاء يلي رح تستغربوه لأنو كتير شعبي بس برضو مكان عشاق لأنو ماخليت اسم كافيه بالشام الا وحكيتلها عنو بس هي رافضة ( الخوف ) معشش بقلبها بس شو بدنا نساوي متضطر ساير خطبة هي مو لعبة بعد الجواز منتحاسب لا تلوموني المكان اختيارها هي والمكالن هو ( حديقة تشرين ) بساحة الامويين بدمشق وهي الصورة

وصلت حوالي الساعة عشرة الا عشرة وعم انتظر والوقت يمضي كأنو ساعات لما دقت الساعة عشرة تماما شفتها من بعيد متوجهة لعندي وقلبي صار يدق ويدق وصل شي 250 بالدقيقة وقفت وكل العادة هي مابتصافح وقعدنا نحكي شي ربع ساعة كيفك و كيفك لبعضنا بعدين سألتها شو بتحب تشرب وكانت طلبها عصير فريش كان في كشك بجنبنا جبت وقعدت وضيفتها العصير والشلمونة وعيونها بالأرض وماعم تحكي كل شوي أفتح معها موضوع وأوصف جمالها لحتى خليها ترتاح شوي وكل ماهي تخجل زيادة والبنت كلا ماخجلت كل مالشاب خجل أكتر:10::10: طبعا لهلق الهدية بالكيس قدمتها الها وبحجة ماسك الكيس وهي عم تمسك الكيس تشوف شو في مسكت ايدها هون رفعت راسها وطلعت فيني وشفت أجمل عيون بالكون اجتني شجاعة فظيعة وقتها أنو أعترف بحبي الها ويلي بدو يصير يصير قالتها يا ....... أنا بح........... وبجيت بياع الورد وسألني بدك وردة كنت رح أقوم اضربو وقفت وزورتو حمل حالو ومشي بس بعد شو رجعني مية خطوة لورا فتحت الهدية وقالت ياااااااااي بحرارة انبسطت كأنو طفلة صغيرة ولما نزلت اللعبة اجت عيوني بعيونها تماما ونطقتها قلتلها ( أنا بحبك ) وكأنو سطل مي باردة نكب فوق راسها وصارت ايديها ترجف مسكتهن كانوا باردين مع أنو بيومها بالذات كان الجو حار بس في هوا بالحديقة عم يمر بنعومة جنبنا والأشجارالعالية حوالينا بتفتح النفس للأعتراف وفسرتلها بعدها بعشر دقائق لحتى اتحت نفسها شوي أنو حسام الحلبي لما يبحب بحب بقصد الزواج ومستحيل يحب بتسلية لو ماحسيت أنت البنت المناسبة مستحيل تتطلع هالكمة من تمي يلي هي 0 بحبك يا ....... بترضي فيني كزوج وأبو أولادك وعيونها صارو يدمعو وبكيت سألتها شوفي طلعت فيني وحطت راسها على كتفي قالتلي فرحانة فبكيت !!!! مباشرة أنا تشجعت ومديت أيدي عالجيبة وسحبت علبة مربعة صغيرة فيها خاتمين خطبة

وفتحت العلبة فندهشت مسكت أصبعها وحطيت الخاتم ولحسن الحظ أجا عالقياس تماما وعطيتها الخاتم التاني تلبسني يا مسكتو وايدها عم ترجف مسكت أيدي وحطت الخاتم ومرتين سالت من ايدها بعدين نزل بمكانو بأصبعي

هي نهاية اللقاء الأول يلي كان أجمل لقاء بحياتي


وبالنسبة للموضوعين هي موضوع نفحات اسلامية واسمو ( كيف تخشع في الصلاة ) بس الاسم نزل بالغلط ورح أطلب تصحيحو من الادارة هوالاسم الاساسي ( أسرار أية الكرسي ) وهي الرابط http://www.albailassan.com/vb/showthread.php?t=23730


والموضوع التاني بقسم الصحة العامة والمستوصف اسمو ( ماذا تعرف عن انفلونزل الخنازير ؟ ) وهي الرابط تبو http://www.albailassan.com/vb/showthread.php?t=23731

​

 

[آلبتول]

ولي على بعضي حسام :10:
عم بشوف مسلسل اهل الغرام
يلا يلا وين البقيه
​

 

[روح الشام]

حيووووووووووووووووووو ابو المر شو هادا يسلملي الرومانس لاجلك

وفارس وحسام عنجد قصصكن حلوة كتير :10:

بالتوفييييق شباب

 

[♥البرنسيسة♥]

فارس وحسام شو هالرومانس كلو

شي ناهي ولي على بعضي :10::10:

لقائكن رائع بصراحه التوفيق للجميع يارب​

 

[Dark Heart]

كتتتتتتتتتتتييييييييير حلوة قصتك حسام

 

[Dark Heart]

قصتك رهــــــــــــــيــــــــبــــــــــة فارس
الك مستقبل

 

[البحر الهائج]

حبيب البي ابو المر شو هالخجل هاد اكيد ما كنت مسطهج حتى خجلان كتير شدلي همتك يا عريس وهي احلى نفس اركيلة من شان ايروح الخجل بالدوخة

تسلم خيو فارس على العمل المبدع في قصتك الجميلة والرومانسية وجهودك الرائعة من اجل نجاح المسابقة وأشكر اخي حسام على قصته الجميلة المليئة بالرومانسية والشفافية العذبة وعمله المتفاني لرقي منتدانا الحبيب واشكر كل من عمل ويعمل لإنجاح هذه المسابقة الرائعة التي تدب روح النشاط والعمل الجماعي المشترك بين جميع اعضاء وعضوات المنتدى الغالي والف تحية حب لكم جميع
​

 

[الطير الحر]

والله احلى فرووس شوهادا ما عم اعرفك بهالرومنسية والله عجبتني كتير كانك انت انا وانا انت
تصويتي حيكون إلك يا فارس اكيد

 

[ضجيج الصمت]

السلام عليكم شباب وصبايا
هي اول لقاء بس حبيت أعرضوا بطريقة
ما تكون تقليدية انشالله يعجبكن

درجة الحقيقة في القصة 50%


مسابقة عريس المنتدى المرحلة الأولى- اللقاء الأول
المشهد الأول..

​

نهاري داخلي ( غرفتي .. جولة بالكاميرا على غرفتي.. سرير منكوت .. صور فنانين على الجدران .. نافذة مفتوحة .. تستقر الكاميرا عليي واقف جنب الخزانة وصافن بالتياب وعم فكر شو ألبس .. شو ألبس.. وعم غني و دندن أغنية هاني .. فينك من بدري .. بحبك أنا .. يا مناي يا عمري بحبك أنا .. متمني أشوفك أو ألمح طيفك الليلة يا غالي...)
وبعدين وقع الأختيار على شي متل هدول..

​

المشهد التاني
نهاري خارجي ( طاولة رومانسية جدا وسط مناظر طبيعية خلابة نجلس انا والفتاة متاقبلين ويدرو بيننا الحوار التالي)

( قبل الحوار بحب نوه أنو البنت اسمها سندس وكنت بعرفها من المعهد يلي كنت ادرس فيه لغة انكليزية وكان في بيناتنا اعجاب متبادل بس كان هاد اللقاء الأول)​

أنا : هاد هو المكان يلي كنت ئلك عنو أنو بحلم نعد فيه مع بعض بدون اي رقيب علينا مشان أأدر بوح بكلشي جواتي لأنو حاسو رح يخئنني.. ( طبعا كنت كتير متلبك وقلبي عم يدق بسرعة لدرجة اني حسيتو وقف ) وبهي الأثناء وقدمتلها هي الوردة..​

​

سندس: شكرا كتير:10::10: يا الله ما أحلى هالمكان عن جد كتير رائع و رومانسي ... مو معقول أديشك مزوء
أنا بخجل:10: : تسلمي يا رب بس هيك صبيه بتجنن متلك بدها هيك مكان يليق فيها و بجمالها مشان تكملوا بعض لأنو ما بيحلى غير بوجودك .. كتير كنت اجي لوحدي وحس أنو هالمكان ناقص شي .. وشي مهم .. وهلأ أكتملت عندي الصوره ..
سندس : يعني انت من زمان عم تخطط لهاد اليوم ..
أنا : طبعا شي أكيد وكنت عم أنتظرو على نااااار..
سندس : كنت حس بنظراتك بالمعهد بس كنت مفكرتك عم تتسلى..
أنا : لا شو أتسلى سندس أنا عن جد ما عم أتسلى..:80: أنا من أول مره شفتك فيها حسيت أني ارتحتلك
ولا شعوريا صرت حاول كون مطرح ما تكوني ودائما صورتك بخيالي ما تفارئني لا ليل و لا نهار ولاحتى بالمنام.. سندس انتي قلبتيلي حياتي فوآني تحتاني .. لك انتي سحرتيني .. ما عم نام الليل وانا عم فكر فيكي وبعيونك الحلوين.​

​

سندس : معقول .. ؟!! لهالدرجة ! كل هاد صاير فيك بسببي؟ .. ( طبعا هون صار وشها أحمر متل الليمونه وما عاد أدرت تحط عيونها فيني من كتر الخجل:10::10: )
أنا: اي وأكتر لكن شو مفكره حالك أليلة.. لك سندس أنا .. أنا.. بـ...؟:10:
الكرسون مقاطعا : شو بتحبوا تاخدوا أستاذ ؟ ( قلت ببالي ما عرفت تجي غير هلأ لعمة ضربك شو سئيل)

​

​

أنا : ااه !.. كيف حبيبنا!! شو بنحب ناخد قلتلي؟؟ اي اي طيب لحظة.. شو سندس شو تاخدي..
سندس : على زوءك ما بتفرئ.. (سندس بتئول ببالها : ما بدي اتزهرم شي!! .. يخرب بيتك يا كرسون النحس تضرب ما أغلظك .. لو قاصدها مو هيك )


أنا: جيب تنين قهوة العشاق ..
الكرسون : وغيرو استاذ؟
أنا : سلامتك .. شكرا .. سندس شو رأيك نتمشى لعند هديك الشجرة لبين ما يجيبوا القهوه؟؟
سندس متردده : م م ماشي.. :10:

المشهد التالت .. نهاري خارجي ( موكتير نهاري وقت الغروب يعني )
( أنا وسندس ماشيين بممر كتير حلو و رومانسي بتقول سندس ) ​

​

سندس : كمل كلامك أنا عم اسمعك؟

( لقطة على ايدينا .. وأنا ما شي جنبها بمسك ايدها و بوقف وبقول...)

​

سندس أنا بحبك .. اي بحبك .. من زمان هالكلمة معلئة بحلئي و حاسسها رح تخنئني.. صار الوقت اني قولها وارتاح .. بدي قولها وخلي كل الكون يسمع.. بحبك .. بحببببببببك


( هون سندس بتشد على ايدي كتير و ما بعود يطلع معها الحكي .. وكانها رح تبكي)
أنا: شو سندس شبك ؟ احكي شو رايك؟ أكيد فرحانة ؟ مو فرحانة ؟
سندس : أمم (يعني أي بس بدلعنة.... بتعرفوا البنات! )

المشهد الرابع
نهاري خارجي ( شجرة كبيرة وحلوه و رومانسية )

​

وأفنا شوي ئدام الشجرة و وحفرنا اسماءنا على شجرة الحب ...
وتعاهدنا أنو نضل مع بعض مهما صار.. وأنو نحفر هالحب بقلوبنا كمان...

رجعنا على طاولتنا كانت القهوه بردت طبعا .. بس شربناها لأنها باهظة الثمن؟؟!

و بعدين وصلتا لقدام بيتها.. ودعتها ومشيت ..
​

المشهد الخامس ليلي خارجي ​

أنا عم أتمشى بالشارع وأتذكر كيف كان هاليوم الرائع وحسيت أديش انا مبسووووووووط وطاير من الفرح وكل العالم ما بيوسع فرحتي الكبيرة ..
وصلت عالبيت دخلت على غرفتي ونمت وصرت أحلم أحلام سعيده ..

وهيك كان اللقاء الأول
شكرا لوقتك الثمين يلي منحتوني ياه
وبتمنى نتال رضاكم وتصوتولي

​

​

​

​

​

​

​

 

[دلوعه وكلمتي مسموعه]

شو حلوة تبعك برافو عليك
مميزة كتير
كتير حلو ضجيج نشالله الكل بصوتلك
​

 

[♥البرنسيسة♥]

بيجنن لقائك ضجيج مميــــــــــــــــــــــــــــــز

رائع بصراحه ​

 

[Bilal Mohammad]

والله لقاااااااااء مميز كتيييييير بصراحة ضجيج انشاالله الكل رح يصوتولك بإذن الله

مع انو نزعلك مرائك الكرسون بس شو بدك تعمل يلا سيدي
اصلا كل الكراسين هيك بس يشوفو واحد قاعد هو وحدة بصيرو يتغالظو عليه


موفق انشاالله
​

 

[قيــ الروح ــثارة]

والله هالشباب عم يأبدعوا احترنا لمين بدنا نصوت هلئ
​

 

[shadoo]

ضجيج
الله حيووووووووو​

 

[STELLA]

كتير حلو لقائك ضجيج الصمت

ومميز

بس لفت نظري شغلة

( طبعا هون صار وشها أحمر متل الليمونه وما عاد أدرت تحط عيونها فيني من كتر الخجل:10::10: )

​

شلون أحمر وليمونة؟؟

جد المشهد رائع بكل مافيه ... بتمنى التوفيق للكل ​

 

[ضجيج الصمت]

ملحق بالمشاركة السابقة سقط سهوا
(أو بالأحرى ما رضي المنتج يحطون بالمسلسل تبعو قال شو...!! ما بحب الدعايات)
:19::19::19::19::19::19::19:​

موضوع القرآن الأمريكي الجديد (استغفر الله العظيم ) وهي الرابط​

http://www.albailassan.com/vb/showthread.php?p=243045#post243045

موضوع تمارين ونصائح صحية هامة ومفيدة جدا وهي الرابط​

http://www.albailassan.com/vb/showthread.php?t=23788

أرجو الفائدة للجميع وشكرا لكل من شارك
​

 

[ضجيج الصمت]

شكرا دلوعة .. أمووووووووووووول .. فتون .. شادو .. أبو المعتز .. ستيلا ... والكل

شكرا لمروركن الرااااااااااااااااائع

​

 

[ضجيج الصمت]

كتير حلو لقائك ضجيج الصمت ​

ومميز ​

بس لفت نظري شغلة​

شلون أحمر وليمونة؟؟​

جد المشهد رائع بكل مافيه ... بتمنى التوفيق للكل ​

ستيلا ... أنا قاصد أكتب هيك مشان طري الجو يعني متل ما بقولوا حبيت رش فوق القصة
رشة كوميديا صغيره مشان تستمتعوا فيها أكتر
شكرا كتير لملاحظتك والشكر الأكبر لمرورك و ردك اللطيف

​