سيناريوهات سورية يومية... (غير منقول)

[DE$!GNER]

إدارة المنتدى الكريمة:
الموضوع غير منقول على الإطلاق وهو من جهدي الشخصي.. وإن وُجد في أي صفحة من صفحات الانترنت فاعلموا أنه جهد شخصي... إذاً فلنبدأ بسيناريوهاتنا اليومية...

1- في الصيدلية:
لو سمحتي عطيني شامبودوف (لون زهر) بتتفرج الصيدلانية على رف الشامبويات... في لون بنفسجي - أبيض - شفاف...
أي واحد بدك عيني هداك (مع أنو بتكون سمعانة ها)... لأ بدي اللون الزهر... ما عندي والله..

2- عند السوبرماركت:
لو سمحت بدي علبة فول تبع الدرة سادة... ما عندي الدرة عندي مروة مفلفلة تاخود وحدة... لأ يسلمو بدي الدرة السادة

3- عند الخضري:
لو سمحت عطيني كيلو عنب... تكرم عينك... بأديش كيلو العنب... بأربعين ليرة... بروح بعبي عنب برجع ع الميزان طلعوا كيلو وربع... بيقول البياع هي بخمسين ليرة تمام... لأ بدي كيلو عنب واحد بس...

4- بالميكرو:
أجرة الركب 10 ليرات سورية... بيكون الميكرو مليان بتطلع بالميكرو أنت لحالك ما بيطلع حدا معك... بتدفع 10 ليرات... بكل بلادة بيسألك اللي دفعتلو: واحد؟ ... لأ خمسين....

5- بالشارع:
الشارع معجوء والسيارات فوق بعضها متلتلة... بتوقف سيارة فجأة بنص الشارع... مرحبا أبو فلان.. أهلين أبو فلان... شو ليش ما عم نشوفكون.. والله قلة فضا... وبيسردوا أحاديث وبيناموا ع الشارع ووراهم صار طابور من خمسين سيارة... إي صف السيارة وكمل حديثك على جنب...

6- كمان بالشارع:
وحدة عم تقطع الشارع هي وولادها... بيوقفلها ابن الحلال مشان تقطع... بتوقف وراه السيارات وبيبلشوا... بيييييييييب بييييييييييييب بيييييييييب.... بيصرعوا الحارة كلياتها... مشان أنو عطلهون عم أشغالهون... وهو بيكون رايح يلطش بنات بالتجارة...

7- عند الدكانجي:
ولد بيفوت لعند الدكنجي...عمو حطلي بخمس ليرات بزر.... تكرم عمو... بعد ما حطلو... عمو.. بأديش هدول؟ إي تضرب شو هبيلة...

8- بالتكسي:
بيطلع زبون.... بيقلو للشوفير: زكاتك شغللنا العداد... طيب أنت وين رايح... على ساحة الأمويين... خلص ما بنختلف... بس يوصلو على ساحة الأمويين... بيضلوا ساعة عم يخانقوا ع الأجرة... إي اختلفوا....

9- عند بياع الزجاج:
زكاتك ركبلي زجاج لهالشباك يكون أخضر... ما عندي أخضر والله بتحب ركبلك ياه عسلي... إي لأ بدي ياه أخضر...

10- عند بياع التياب:
بتفوت وحدة لعندو بتنقي قطعة... بعد ما تعتمد بتسألو.. بأديش هي... بـ 2500 ليرة... راعيني شوي الله يجبرك... والله يا اختي ما بتشتغل (طبعاً لأنو ما إلها موتور يشغلها)... طيب الله يكرمك نزلي شوي بالسعر والله كتير غالية... والله يا اختي ما فيها شي ( إي طبعاً ما فيها شي لساتها جديدة)...
بتعمل الوحدة حالها مو بعينها بس هي بتكون رح تطق بدها القطعة... وبتطلع من المحل مشان يناديلها ويقلها تعي خديها 2000 آخر كلام... بترجع المسكينة لتاخدها وبيلفلها ياها وهي بتكون مبسوطة....
إي يخرب بيتك جملتها موقفة عليك بـ 1000 ليرة وين بدك تقرط ع المخلوقة 1500 ليرة... يخرب بيتك شو أنك بلهموتي...

إن استطعتم الإضافة فأهلاً وسهلاً بكم...
​

 

[ندى القلب]

عجبووني بس على فكره هدول سيناريوهات عربيه مش بس سوريه


يعني الحال من بعضوو وين مااااكنت​

 

[- ]Safee[ -]

ه

أي شو يعني.. عادي (لكان اتو ماتيك ولا ألك سياحي)​

 

[mr_ops]

يا اخي والله مزبووووط مية بالمية هاد الي بصير عندنا بالشام ..


تسلم ايديك ديزاينر
​

 

[DE$!GNER]

عجبووني بس على فكره هدول سيناريوهات عربيه مش بس سوريه


يعني الحال من بعضوو وين مااااكنت​

يعني هلأ خلينا نبلش من السيناريوهات السورية... شنو هدول بعرفهون منيح لأني عايشهون... وبعدين بس اطلع ع البلاد العربية مشوار بكتب الباقي...
بس إذا انتي عندك شي سيناريوهات من بلدك طجيلنا كم واحد هون يلا...

ه

أي شو يعني.. عادي (لكان اتو ماتيك ولا ألك سياحي)​

شو مشان الأوتوماتيك

يا اخي والله مزبووووط مية بالمية هاد الي بصير عندنا بالشام ..


تسلم ايديك ديزاينر
​

حبيبي انت يا هُمام... يلا شوف اللي بعدهون...

 

[DE$!GNER]

12- في المسلسلات الدرامية:
صار وقت الليل... مشهد ليلي.. غرفة نوم... ضوء القمر الأزرق... دنيا باردة... بينزل الممثل والممثلة تحت الشرشف... عم يمثلوا مشهد النوم... يعني كتير مهم مشهد النوم... بس يلااااااا كلو بيندرج تحت اسم (((((( الفن )))))).

13- في أحد الشوارع:
ولد عمرو 10 سنين... الدنيا تقريباً عم تعتم... وما في غير ضو البلدية... الولد بيكوع ع الأرض وبينام متل القطاط... بيستجر عطف الناس... نص عين فايقة والنص التانية نايمة... طبعاً العين التحتانية هي الفايقة... بتمرق هالناس وبترمي مصاري قدامو... وهن شايفين هالولد يلي ما عم يلاقي بيت ينام فيه... بعد شوي بيلم هالمصاري وبيروح... بيستقبلو شب... معلم الكار... معلم المهنة... بيقلو: هات ولا ورجيني شو طلعت اليوم... طبعاً الولد بيطلع كل شي معو مصاري... ولك هدول طلعو كلهون شغيلة تحت إيد المعلم يلي عم يبيع صبارة على طرف الشارع...

14- على جسر المشاة:
شحادة قاعدة عمرها بين الـ 20-30... كرمال الله تساعدوني... والله بحاجة... يخليلكون ولادك كرمال هالأيتام... حاملة بإيدها ورقة موقعتها بألف توقيع وعليها ألف طابع على أساس أنو هي عملية جراحية... (لأنو كتير صعب نعمل ورقة ع الفوتوشوب بخمس وعشرين ليرة سورية)... المهم... كرامة لله وكرامة لعبد الله... ولك لساتك صبية بعز شبابك... ولك إذا شطفتي دراج البنايات وطلعتي باليوم خمسمية ليرة مو أشرفلك من هالإذلال... بس شو بدنا بالحكي... كار الشحادة بيطلع أكتر... ومتربع على هالأرض ومبسوط لا وراك ولا قدامك... بيكفي أنك تكسر إيدك وتشحد عليها...

15- على موقف المكرو:
الساعة 3.00... الموظفين عم تنصرف... الموقف مليان... طبعاً 3/4 الموظفين من جيل الشباب بين الـ 20-35 سنة تقريباً... واقفين كلهون بلسخة هالشمس وناطرين الميكرو ليجي.. لأنو الشارع مليان سيارات... والمكاري بهالوقت بتكون مستأجرة إما لصالح موظفين خاصين أو لصالح روضات الأطفال... المهم... بيوصل هالميكرو لعند الركاب... ما بيوقف... لالالالالالا بيضلو كارر لقدام شي 20 متر... وبينبسط وهو شايف هالعباد عم تركض لتوصل لعندو... طيب ما أنت يا شوفير جرب شي مرة تكون واقف وحدا يعمل فيك هالفصل... مو بتحس حالك بدك تشلحو الميكرو وتنزل فيه قتل بنص الشارع...

16- على نفس الموقف:
هالصبايا - يعني الله يستر على كل العباد - هالجينز الديق والتنورة القصيرة... والبودي..و...و..و.. المهم... في شب ابن شسمو واقف ما عم يستنى الميكرو ها... بس كل ما يوصل ميكرو بيركض لعندو... أنو بدو يركب ها.. بس مسكين ما عم يحصل كرسي... ولك ليش... إي طبعاً لأنو بس تركض البنات ع الميكرو.. بيروح هو وبيلزق ورا البنت وبيحركش فيها.. والبنت ما عد يهمها شو عم يصير المهم تركب مشان توصل على بيتها... إي يا ابن الذين آمنوا... تخيل اختك بهالموقف... شو بتساااااااوي؟

يلا حاجة اليوم...
​

 

[ĻàĎỷ iЙ ŖẼD]

حلوين يسلم هالديات

 

[DE$!GNER]

17- في فرن الخبز:
واقفين الجماعة ع الدور من كبيرهون لصغيرهون.... وناطر كل واحد بدورو لياخود خبزاتو... بيجي شب بينط من فوق الكل وبيوصل ع الشباك.. بدو ياخود... يا معلم في دور شو يعني كل اللي واقفين قدامك حمير... حبيبي بدي بس ربطين خبز... إي وأنا واقف ع الدور بدي ربطين خبز صرلي ساعة واقف...

18- عند موظف الطابو:
السلام عليكم معلم... عليكم السلام أهلين حبيبي أمور... مشيلنا هالمعاملة زكاتك.. إي تكرم عيونك بأمرك أنا... (بتنطرلك شي خمس دقايق بترجع بتسألو)... معلم الله يخليك ورايي شغل مشيلنا هالمعاملة... إي تكرم عيونك يا باشا بأمرك أنا وبأمر كل الأكابر... (بترجع بتنطرلك كمان شي عشر دقايق)... يعني يا حبيبنا إيمتى بدك تمشي المعاملة... ولو يا أستاذ كلك نظر (وبيفرك أصابيعو ببعضهون)... ولك بحياتك شفت معاملة بتمشي بلا بنزين؟

19- بالشارع:
وي وي وي وي وي... سيارة أسعاف جاية بسرعة... عم تزمر ومعاها مريض (اللهم عافينا)... ماشية على يسار الطريق بسرعة.. وعم تزمررررر... وهالسيارات عم تبعدلها... سرعتها وصلت للـ 120 ع الأوتوستراد... وتزمر... والسيارات عم تبعدلها... بالأخير توصل ع المشفى لا معها مريض ولا شي... طلعو الشباب مو مستعجلين بس مشان يوصلوا بسرعة...

20- بالشارع التاني:
سيارة إسعاف جاية بسرعة ومعاها مريض بجد... وصلت السيارة على إشرة مرور... طبعاً لازم الشرطي يمشي السير... مشان تمرق السيارة تبع الأسعاف... ما حدا بيبعدلها... بالعكس... كلو بيصير بدو يصف قدامها مشان يمشي ع الإشارة الحمرا... والمسكين المريض جوا... عم يتقلى من وجعو... تخيل حالك محلو (من غير شر)...

21- بالباص تبع الدولة:
قاعدين الشباب ع الكراسي وما في مطرح... بيطلع ع الباص رجال كبير بالعمر... كل الشباب بيصيروا بيديروا وجهون ع الشبابيك... وبيعملوا حالهون مو شايفينو للختيار المسكين... بعد شوي بيوقف الباص... بتطلع وحدة شقفة... لابسة جينز مخصور... وبودي ومسشورة شعراتها... وريحة البارفان والديودوران خنقت الباص... كل الشباب بتدير وجهها عن الشباك والشاطر يلي بدو يقعدها محلو... يا ريت خلصت القصة هون... رح نكملها بالفقرة يلي بعدها...

22- على كرسي الباص:
قعدت البنت محل الشب... طبعاً الشب حط إيد هون وإيد هون وعانق الكرسي ولزق بالبنت... والبنت احتارت... بدها تلزق بهاد الشب ولا بالشب يلي بالطرف التاني... ما هو الشب مو تاركلها مجال تتلحفظ... ولازق فيها لزق... وكل شوي يتغمالها بعيونو ويطلع فيها... وهي قرفانة الساعة اللي طلعت فيها بهالباص... شو بدها تساوي... إذا حكيت بتفضح حالها... وإذا سكتت بيهلكها ابن الشسمو اللي واقف... إي تضرب (البعيد) شو دمك تقيل... زيح شوي العمى شو ما عندك أخوات؟؟؟

يتبع في الحلقات القادمة...
​

 

[ĻàĎỷ iЙ ŖẼD]

انت نهفة يا زلمة

​

 

[Faby]

التسجيل بكلية التعليم المفتوح بدمشق ...
بتجي من صبحية ربنا لتاخد رقم وبيطلعلك الرقم 208 f
يعني عليك نطرة بالشمس او البرد اقلها شي تلت اربع ساعات ... بتقول اي مو مشكلة معي رفقاتي بتسلى
وبتنطر بتنطر وبهاد الوقت بيكون ما بئي شب الا ومرق وطبق
وبالنهاية بيجي الدور زا كنتي بنت ف من حسن حظك يطلعلك شب موطف اما ازا كنتي من قليلي الحظ ف بتطلعلك موظفة ..
بتستقبلك بابتسامة مشرقة بترفعلك معنوياتك للسما بتعطيها وراق التسجيل والوصل (كتير مهم ) وبتمسك البطاقة وبتمحص بالصورة
"هلئ هي انتي"؟؟؟؟؟؟؟؟
اي نعم انا
طيب ليش بالصورة طالعة بيضا وهون مدري شو لونك
اي غالبا لاني انحرئت بالشمس
طيب...ليش عيونك خضر وبالصورة مبينين زرق
عالاضاءة مدام
بترجع بتمحص بالصورة ...انو ناوية تخطب متلا؟؟؟؟
وبتسكتلا شي ساعه
هون بتحسي انو وصلت معك لمرحلة ولك خلصونا شو عم نسرق التسجيل سرقة يعني دوبنا نلحئ ندفع بالبنك يلي لقسمنا لازم ننشلف عالمشروع لندفع ونرجع عالمزة لنوقع البطاقة ونروح عالمدينة نجيب الكتب
واخرتها ...
هاد الفصل اتطورنا قال رح نسجل online
لنشوف شو رح يطلعلنا فنات جديدة لانو ما بنئدر بلاها (بدون تعليق )

 

[- ]Safee[ -]

مسلسل حلو و واقعي كتير

قبل ما تطلع عالاوتوماتيك طلع عابن الشسمو او ع الربطين...​

 

[DE$!GNER]

23- في طريق الصالحية:
وحدة ماشية هي وجوزها بهالطريق... وطبعاً الناس ماشية من ع الصفين يمين ويسار... فاتوا اشتروا بوظة من عند الليوان... على فكرة بيحط تلات طابات بوظة بتلاتين ليرة يعني بالحسبة الطابة بعشر ليرات... ما علينا... فجأة بيضطر جوزها يوقف ليربط البوط (الحذاء) تبعو... هي بتكمل مع الولد لئدام شوي... بيمرقوا شبين واحد منهون بينترها جملة وبيضلوا مكملين... بيجي الرجال معصب لأنو انتبه ع الموقف... وبيسألها... شو قالولك... طبعاً الزوجة ما بدها جوزها يعلق مع الناس... بيرجع بيسألها شو قالولك... تاري ابن الناس حاكيلها أنو: مو طيبة البوظة برمضان... بيروح الرجال لعند الشب بيلحقو... شو بتتوقعوا رح يعمل... طبعاً لو كان غبي وبنص عقل رح يضربو بنص الشارع ويعملو قتلة... حط إيدو على ضهرو وقلو: يا رب تكون اختك شي مرة ماشية بالصالحية... وعم تاكول بوظة.. ويمرق شب من وراها... ويقلها حدا بياكول بوظة برمضان

24- بالشارع والجو مطر:
واحد ماشي بالشارع وراكض ركض تحت رحمة ربكون... وطبعاً بتعرفي على كتر مو الزفت عنا مزفت... بتلاقي المي تبع المطر جورة هون وجورة هون... وبتلاقي كل بقعة مي قطرها شي مترين وعمقه شي شبرين... ما علينا.. المهم هالواحد بيمرق من قدام هي الجورة... وفجأة واحد جاية بسيارة ومسررررع... هادا الواحد مسكين بيرفع إيديه وبحاول أنو يقلو هدي شوي في جورة هون... ومليانة مي... بس هداك قد ما لو فظيع بينتبه أنو الشب عمل هيك... بس بيعمل حالو ما شافو وبيروق معبيه مي من فوق لتحت... يعني هي رحمة من الله من فوق ومجبورين نتحملها... بس قلة رحمة البشر كمان مجبورين نتحملها؟

25- ملعب كرة القدم:
مباراة بكرة القدم بالدوري... الفريقين جوا الملعب...عم يلعبو... المدرج يتسع لخمسة آلاف متفرج... المعلق قاعد مع رفيقو على طاولة بلاستيك وكراسي نايلون ورا خط التماس وفوقهون شمسية متل تبع شط البحر... المهم هن وعم يلعبو الشباب واحد من اللعيبة بيلمس الطابة بإيدو... والحكم ما بينتبه بيعترضو اللاعبين وبيلحقو الحكم واللعبة شغالة... بعدين بيبلشو يتناقرو مع لعيبة الفريق التاني... وإنت لمستها وأنا لأ وأنت إي وأنا لأ وعلقت بين الطبالة والزبالة... واختلط الحابل بالنابل.... والجمهور بيفز بيكسر كراسي الملعب وبيتعالقو وبتتدخل الشرطة... وحااااالة إي شو نحنا بملعب كرة قدم ولا بحلبة صراع الثيران؟

إلى سيناريوهات أخرى إن شاء الله...
​

 

[DE$!GNER]

26- عند الحلاق:
كلو قاعد عند الحلاق وناطر دورو.. طبعاً الحلاق شغال وعلى طق طق طق بهالمقص... بيفوت واحد... السلام عليكم يا شباب.. كيفك أبو محمد... كيفك أبو عماد... كيفك أبو شفيق... بيطلع بالحلاق كيفك أبو عماد... إيمتا دوري... أنا شغلتي بسيطة... قشة دقن.... والناس اللي قاعدة ع الكراسي عم تستنى شو بنسميها؟؟؟؟؟

27- تحت جسر الثورة:
كتر خير الحكومة... زبطت الجسر تبع الثورة وعملتلو لمبات... وطينت الحيطان وليستها وساوتها ناعمة ونضيفة... وزفتت الشارع ورتبت الرصيف... يعني رجعتو جديد (نوعاً ما)... بتمر من تحت الجسر بتلاقي شب واقف بالزاوية وجهة ع الحيط فاتح رجليه وإيديه قدام... عم يتبول الأخ ع الحيط.... الحكومة بتزبط الحيطان... والناس بتتعهدها نعلة صفرا نص متر...

28- بالبيت:
راجع من شغلو الزلمة... تدوش ورتب حالو وتسطح شوي... بدو يتفرج ع التلفزيون... شغل المكيف بعز دين الشوب... وقعد... فجأة... طراخ... بتنطفى الكهربا... ربع ساعة.. نص ساعة... ساعة... ساعة ونص... بيتصل بالطوارئ... لو سمحت المنطقة الفلانية انقطعت فيها الكهربا.... إي تقنين أخي... الفرندات والبلاكين مزينة باللمبات تبع رمضان وعيد راس السنة وعم تضوي طول الليل... ليش ما بتوقفوهون عند حدهم وبتبطلو تقنين؟

29- بالشارع:
صبية ماشية... مكحلة مغندرة بتجنن بتطير العقل...هالروج وهالبودرة والمونيكور... والشوبيعرفني شو... والبنتلون الجينز الضيق.. وهالقصع بمشيتها... والرموش الطويلة... وضحكتها لأدانها خمس وتلاتين شبر.... بس.. أوف... شو... معليش معليش... ما قدرت أوصفلكون شعرها... لأنها محجبة....

30- بالتكسي:
مشي الشوفير... أمرنا لله ما شغل العداد... معروفة من هالنقطة الفلانية للنقطة الفلانية بيطلع خمس وعشرين ليرة.. ماشي؟... مشي هالشوفير... وبنحكي معو... مبسوط الأخ... يا أخي الدنية عيد... وفرحان الزلمة... وصلنا ع الموقف هوب.... ع اليمين زكاتك... بنعطيه خمسين ليرة... معوضين؟!!!!!!!!!!!! إي شو معوضين بيطلع خمس وعشرين ليرة... إي ما بدك تعطينا عيدية؟؟؟؟ إي شو أنا أبوك اللي جابك لحتى أعطيك عيدية... موظف منتوف عايف التكنة متلي متلك إي أنا مين بدو يدحشلي العيدية بجيبتي؟؟؟؟؟؟؟؟؟؟؟؟؟

31- بالمركز الثقافي الفرنسي:
والله العزيم (العظيم) كنت مبارح عند اختي بالقسور (بالقصور) وتلعنا (وطلعنا) أنا وياها ع السوء واشترينا كم ئتعة (قطعة) مشان إجي فيهون ع السانتر (center)... ما عندي شي بالخزانة إلا هالكم بلوزة والبنتلون... ه بعد كم يوم لقيتها بالسوق تبع الباليه عم تشتري تياب مستعملة.... واو... ياي... ه ه ه راحت النعومة وهي عم تفاصل البياع ع الفرنك والفرنكين... إي ما بيكفي انتي عوجا... ليش عم تعوجي لسانك؟

وإلى حلقات أخرى قريباً...

​

 

[ندى القلب]

ايمتى رح يتغيييييير هااااااااد كلوو ايمتى؟؟

ايمتى بنبلش نغير حالناا والي ببيتناا حتى يتغيرو الي حوليناا

يااااااااارب يكون قريب​

 

[mr_ops]

19- بالشارع:
وي وي وي وي وي... سيارة أسعاف جاية بسرعة... عم تزمر ومعاها مريض (اللهم عافينا)... ماشية على يسار الطريق بسرعة.. وعم تزمررررر... وهالسيارات عم تبعدلها... سرعتها وصلت للـ 120 ع الأوتوستراد... وتزمر... والسيارات عم تبعدلها... بالأخير توصل ع المشفى لا معها مريض ولا شي... طلعو الشباب مو مستعجلين بس مشان يوصلوا بسرعة...

عندي وحدة شبيهة فيها ..

جماعة جايين بسيارة الاسعاف ومسرعين .. مشغلين الزمور وطايرين بين هالسيارات وعالاشارات الحمرا الشرطي عم يمشيهم وبدهم يوصلوا بسرعة بسرعة ... بالآخير وصلوا الجماعة وفتحوا باب السيارة ونزلوا منه وفتحوا الباب الخلفي للسيارة وطلعوا الـ ......

بتعرفوا شو طلعوا ؟؟؟ لا مريض ولا ميت كان معهم ..




طلعوا صحون الصفيحة والفطاير .. آل كانوا مسرعين مشان يوصلوا بسرعة عالمستشفى والاكل سخن مشان ما يبرد .. وهي حقيقية صايرة مع واحد بعرفه كان يشتغل بالمستشفى وحكالي ياها ...

الظاهر كان عندهم عزيمة بالمستشفى حدا جاييلهم من قرايبين فلان وفلان وحابين يعملوا الواجب معهم
اي صحتين وهنا يا رب ..
​

 

[mr_ops]

يا خي انت خرج تعملهم حلقات من مسلسل بقعة ضوء .. لانه فعلا هاد الي عم بصير عنا بالبلد .. بس انه بنتلون وسانتر ومدري شو وبالآخير سوء البالة وعم تفاصله وصوتها جاعوري .. قوية جدا جدا هي .. ومع الاسف هاد الي موجود هالايام ..
​

 

[DE$!GNER]

يا خي انت خرج تعملهم حلقات من مسلسل بقعة ضوء .. لانه فعلا هاد الي عم بصير عنا بالبلد .. بس انه بنتلون وسانتر ومدري شو وبالآخير سوء البالة وعم تفاصله وصوتها جاعوري .. قوية جدا جدا هي .. ومع الاسف هاد الي موجود هالايام ..
​

لو ما لو موجود ما بكتبو... وإلى حلقات جديدة من مسلسل: سيناريوهات سورية...

32- بالكازية:
وقف سيارتو وطفاها... طفى الموبايل والسيكارة... يا أخي لسلامتو وسلامة المواطنين... ما علينا... عبيلي بينزين 15 ليتر.... الليتر بـ 40 ليرة... يعني 15 × 40 = 600 ل.س.... عبالو الزلمة 14 ليتر ونص... بيعطيه الـ 600 ليرة.... والبنزينات يلي بالبربيش (الخرطوم) بيرجعوا ع المكنة... يعني سرقلو من ورا هالتعباية حوالي الـ 50 ليرة... طيب إذا افترضنا باليوم عبى 50 سيارة (هادا فرضاً)... من كل سيارة 50 ليرة... طلع باليوم 2500 ليرة... يعني بالشهر حوالي 75000 ليرة... هادا عدا معاشو... عم فكر بطل ديكور وتصميم وكومبيوتر... وانزل بكرا اشتغل معبياتي....
بالمناسبة هادا الكلام بينطبق على سيارات تعباية المازوت للبيوت...

32- بالشارع:
ماشي بالشارع بأمان الله... والدنيا صيف... وعم يخانق دبان وجهو الزلمة... وفجأة بيمرق شب تاني من جنبو بيطرقو بكتفو... بتعتذر أنت عن الطرقة... هو بيطلع فيك بعين وقحة: العمى شو ما لك شايف... يا ابن الناس اعتذرتلك... شو بدي باعتذارك... وين بصرفها هي؟ إي لكن شو بدك ياني ساوي؟؟ آخدك ع المصلح وركبلك براغي جديدة لكتفك...

34- موقع البناء:
خيو... في بيت عربي... فايت طالع وبيعمل الشارع متل قطعة القماش المثنية... المهم... قرروا يهدوا البيت ويطلعو ببناية بدالو... بيشتغلوا ع المخططات التنظيمية يلي بيجيبوها من البلدية... وعينك ما تشوف هالمخططات التنظيمية... يا أخي الشارع لازم يكون مستقيم... لألألألألألألألألألأ... بيرسموا مخطط البناية متل ما انهد البيت العربي بنفس الحدود... مو بيزبطوا المكان وبيعملوا شارع مستقيم... إي دنب الكلب أعوج ولو حطوه بستمية قالب...
على هالسيرة بتذكر مرة بسأل واحد عم يطلع ببناية... قلتلو: هلأ بربك أنتو ما بتوفرو متر واحد إلا ولازم تعمروه حتى ولو طلع العمار أعوج ألوق... بتعرفوا شو جاوبني؟ قلي: لو بيكون عندي أرض طولها 3 متار وعرضها 3 متار غير أطلع فيها أربع طوابق غرف...

35- بالباص تبع الدولة:
طلعوا شلة شباب بالباص هادا تبع الدولة... بتعرفوا حاطين عند الباب الخلفي زمور مشان يزمر للشوفير وقت بدو ينزل... شلة الشباب على حكي فاضي ومزح بلا طعمة وكل شوي بيكبسوا الزر والشوفير مسكين عبد مأمور مو طالع بإيدو شي غير يقول حاجة لعب بالزمامير يا شباب... بيشعلوا سيكاير وبيدخنوا... والمرسوم تبع سيادة الرئيس بيمنع هادا الشي... ولك ما عندهون أهالي يربوهون... ولا لازم يربوهون غير أهاليهون...


36- بالمكتب:
عينوه مستخدم مشان يكنس المكتب ويشطفو كل يومين تلاتة... يا أخي بيفوت مدير عام وزير... لازم المكتب يكون بآخر حلة... بيشتغل أول فترة من قلب ورب... بعد شوي بتخف وتيرة الأداء وبيصير بيتكسلن شوي.. وبيصير يتأفأف من طلبات الموظفين تبع المكتب.... بالأخير بيجيب جريدة وبيحل الكلمات المتقاطعة وبس يخلص الدوام بيروح... ولا كأنو موظف بهالمكتب...

راجعين
​

​

​

 

[mr_ops]

34- موقع البناء:
خيو... في بيت عربي... فايت طالع وبيعمل الشارع متل قطعة القماش المثنية... المهم... قرروا يهدوا البيت ويطلعو ببناية بدالو... بيشتغلوا ع المخططات التنظيمية يلي بيجيبوها من البلدية... وعينك ما تشوف هالمخططات التنظيمية... يا أخي الشارع لازم يكون مستقيم... لألألألألألألألألألأ... بيرسموا مخطط البناية متل ما انهد البيت العربي بنفس الحدود... مو بيزبطوا المكان وبيعملوا شارع مستقيم... إي دنب الكلب أعوج ولو حطوه بستمية قالب...
على هالسيرة بتذكر مرة بسأل واحد عم يطلع ببناية... قلتلو: هلأ بربك أنتو ما بتوفرو متر واحد إلا ولازم تعمروه حتى ولو طلع العمار أعوج ألوق... بتعرفوا شو جاوبني؟ قلي: لو بيكون عندي أرض طولها 3 متار وعرضها 3 متار غير أطلع فيها أربع طوابق غرف...

يا اخي لك ازا كانت نقابة المهندسين بنوا بناية وطلعت مايلة لاسباب ما رح قولها فـ شو بتتوقع من الباقي ؟؟؟

 

[ĻàĎỷ iЙ ŖẼD]

يحرئ همك الهي فرطتني

29- بالشارع:
صبية ماشية... مكحلة مغندرة بتجنن بتطير العقل...هالروج وهالبودرة والمونيكور... والشوبيعرفني شو... والبنتلون الجينز الضيق.. وهالقصع بمشيتها... والرموش الطويلة... وضحكتها لأدانها خمس وتلاتين شبر.... بس.. أوف... شو... معليش معليش... ما قدرت أوصفلكون شعرها... لأنها محجبة....


​

 

[عمر رزوق]

في ببلدنا واحد " عالبركه " روّح عالبيت ولا مرتو وائفتلو بالساحه

- ليش تاخرت ؟ وين كاين ؟

- ليش خير شو في ؟

- البنت مرضاني ومحمومي , ختا للدكتور وئال لازم ناخدا عل المستشفى .

- يالله هايني فايت جيب مفتاح السياره .

المرا فاتت تلبّس البنت .

الزلمه طاير بالسياره , نازل تئطيع بهالسيارات , وصل عل المستشفى

ركاض عل الريسبشن

- وين الدكتور هاي البنت محمومي وعم بتموت .....

موظفة الريسبشن - وين البنت ؟

الزلمة بضرب عراسو

- والله نسيتا بالبيت
​