من مال الله يا .....

[عشتار]

تسير في الشارع بضمير مرتاح .. وقلب يغمره الصفاء والإيمان ..

فبحمد الله مؤد ٍ أنت لكل واجباتك الدينية والدنيوية

و فجأة " يئنبز " أمامك طفل ...

اممممممم .. ربما علينا أن نعيد النظر بكلمة .. طفل ..

على كل ٍ ..

يتشبث هذا الكائن بثيابك ..تحاول أن تقنع نفسك بأنه طفل

والله طفل .. حجمه صغير وصوته ناعم ..بس ...

الله يستر عليكي ... الله يبعتلك ابن الحلال .. الله يلبسك توب العافية ..

( هي للبنات )

الله يخليلك شبابك .. الله ينولك اللي ببالك .. الله ينجحك

( هي للشباب )

طبعا ً ..في احترافية بالموضوع .. شو بدنا نشتغل عالعمياني .. كل شي اله شي

هنا تتضخم أناك .. بالعربي " بتنفش حالك " وبتمد ايدك لجيبتك وبتطلع امممم 10 ليرات

وبتعطيها لهالـ " طفل "

فينظر إليك شذرا ً و كأنه يريد أن يسترد كل الدعوات التي أرسلها إلى الله من أجلك

و لسان حاله يقول : العمى شو بخيل

بيلف ه وبيحط الـ عشرة بجيبته وبيمشي

بتابع طريقك بضمير مرتاح .. طبعا انت هلأ ساعدت محتاج .. ومو أي محتاج

" طفل " يا عمي " طفل "

خطوة تنتين .. بينط بوجهك " طفلين " و يتكرر المشهد .......

وتكتشف أنك أكلت مقلب .. حجم عائلي



تتكل على رب العالمين و بتقول .. لا إله إلا الله .. وبتابع طريقك ..

" ليش فيك ما تتابع .. "

أمانة خبز لهالولاد .. امانة في أطفال جوعانين ..و الله برقبتي ولاد ... حق حليب لهالأيتام

فينفطر قلبك .. وينن هالأيتام .. تنظر

فإذا بها امرأة تفترش الأرض في هذا الزمهرير و تحتضن رضيعا ً بثياب رثة

تكاد تقسم بأنها ليست أمه .. فما من أم ترضى لطفلها بهكذا وضع .. مهما تردت حالتها

ضميرك ما عم يكن .. بلش ينق .. حرام ..مسكينة .. المعاملة مع الله ..

لا إله إلا الله .. وبتحط اللي فيه النصيب

وتتابع ...


شو مسكين .. طفل عاجز "بساق مبتورة " يجلس أرضا ً ..

يتابع الناس بنظرة كسيرة والألم يسيل على وجهه المنكس

لا هي ما بدها تردد .. بتقرب لتعطيه المصاري .. بس



لك هاد عنده رجل بس طاويها ولا بس البنطلون مشان ما تبين

بيهرو المصاري بحضنه .. و ضميرك بلش يغلي

بتـــ ا بـــ ع ... بذهول

لتصفعك صورة طفل بذراع مبتورة يقترب منك طالبا ً لصدقة

لن تحتاج أن تدقق كثيرا ً لتكتشف أنه قد أخفى ذراعه داخل ثيابه

هنا ينفجر ضميرك .. يطق ..



تتمنى لو تمسك بكل هؤلاء وترسلهم إلى الجحيم

و تتابع ...


كان هذا المشهد بداية لحوار سيكون .. أتمنى أن يحمل الفائدة للجميع

إنه التسول

فما رأيك ...
​

 

[عشتار]

المتسول كما عرفه القانون السوري قانون العقوبات في مادته 596 .‏

من كانت له موارد أوكان يستطيع الحصول على موارد بالعمل فاستجدى لمنفعته الخاصة الاحسان العام في أي مكان كان إما صراحة أو تحت ستار أعمال تجارية .‏

والعقاب هنا هو الحبس مع التشغيل مدة شهر على الأقل وستة أشهر على الأكثر ويمكن وضع المتسولين بدار التشغيل المحدثة بالقانون رقم 16 تاريخ 22/11/1975م لمكافحة هذه الظاهرة الخطرة التي تجر وتسبب جرائم أدهى وأمر.‏

فالمتسول كان أباً أم أماً أو أي شخص آخر يصطحب طفلاً كان ولده أوغير ولده وهو دون السابعة من عمره يشدد عقابه ويصل الى الحبس سنتين - المادتين 569- 599 عقوبات- وكذلك من دفع قاصراً الى التسول جراً لمنفعة شخصية يعاقب بالحبس ستة أشهر الى سنتين فضلاً عن الغرامة، المادة- 604 عقوبات .‏

وإذا كان أبوالقاصر أو أهله المكلفون باعالته وتربيته لم يقوموا بذلك رغم اقتدارهم وتركوه مشرداً يعاقبون بالحبس من شهر الى ستة أشهر مع الغرامة -المادة 6030 عقوبات

- أما المادة -599 عقوبات - فتنص على مايلي:‏

إن المتسول الذي يستجدي في احدى الظروف التالية:‏

بالتهديد أو أعمال الشدة بحمل شهادة فقر حال كاذبة بالتظاهر بجراح أوعاهات والتنكر بأي شيء وكان برفقة ولد غير ولده أو أحد فروعه ممن هو دون السابعة من العمر يحمل أسلحة أو أدوات باقتراف الجنايات والجنح بحالة الاجتماع مالم يكن الزوج وزوجته أوالعاجز وقائده ...‏

كل ذلك يعاقب بالسجن من ستة أشهر الى سنتين مع التشغيل فضلاً عن وضعه في دار التشغيل إذا كان غيرعاجز وبالحبس البسيط المدة نفسها إذا كان عاجزاً ويمكن أن يفرض عليه تدبير الحرية المراقبة.‏


​

 

[عشتار]

باعتراف رسمي: التسول في سورية منظم ومعقد
​

* قال معاون وزير الشؤون الاجتماعية والعمل الدكتور عيسى ملدعون :

أن ظاهرة تسول الأطفال هي ظاهرة اجتماعية منظمة ومعقدة في سورية

ولها و تشابكاتها.

* بينما كشف رئيس جمعية شباب المستقبل خلدون داوود

عن بعض العائلات التي تقوم بتأجير أطفالهم المشوهين أو المعاقين بأجر يومي لبعض المتسولين مقابل مبالغ مالية تصل في بعض الأحيان إلى 3 آلاف ليرة باليوم



​

 

[عشتار]

اقترح مُقترٍح على وزيرة الشؤون الاجتماعية والعمل صاحبة المقولة الشهيرة :

"لا يوجد لدينا فقراء.. وإنما هناك الأقل دخلاً"

وعلى اعتبار أن أعداد المتسولين هي الأكثر نمواً ضمن معدلات خططنا الخمسية الناجحة

أن تقوم الحكومة، بمساعدة وزارة الضرائب، على مشاركة المتسولين في أموالهم، بعد تنظيم أعمالهم

ستكون خطوة ذكية ومُدرّة.. للخزينة..


​

 

[عشتار]

يقول قائل .. وكما دوما ً القول على ذمة القائل :

​

نرى أن الأخوة المواطنين هم الملومين في ازدهارالتسول، خصوصاً أنصاف المتدينين الذين ما زالوا يفهمون تفسير الآية «وأما السائل فلا تنهر» بالغلط، لأن المقصود بالسائل هو الذي يسأل بغرض الحصول على المعرفة وليس المتسول الذي يسفح كبرياءه ويحط من إنسانيته بسبب كسله الذي يدفعه لتجميع المال بأسهل السبل

ومن مال الله يا .....
​

 

[إلهام]

لا اعلم بماذا اعلق
ولكن هي ضاهرة موجودة ومنتشرة بكل بقاع الارض
من المسؤال الاول عنها
طلب الكسب السريع
قلة الطموح ام فعلا العجز
المجهود الذي يبذله الشخص في تسول بدون كرامة
يستطيع ان يضعه في مكانه الصحيح بالكسب الحلال وبشكل كريم
نجد اليوم البلديات
تقوم بملاحقت البائعيبن المتجولين باي نوع من البضاعة
وتحرمهم الكسب والقوت
تناقض غريب في المبادء والمفاهيم
شكرا عشتار لموضوعك

​

 

[ღRosa Blancaღ]

موضوع حلو مشكورة حبيبتي والله هادا الموقف صارلو صاير معي شي تريليون مرة وكل مرة بقول واما السائل فلا تنهر وما فيني ما مد ايدي واعطيه


عكل الله يرزقون ويغنييون عن هالبهدلة

 

[عشتار]

بتعرفي يا صديقتي انو الآية الكريمة التي ذكرتيها هي ما شجعني على طرح الموضوع

فالتفسير العميق لها :

أنه تعالى قصد سائل العلم الباحث عن المعرفة ..

وليس المتسول الذي يهدر كرامة الانسان

قال رسول الله صلى الله عليه وسلم :

" لأن يغدو أحدكم فيحتطب على ظهره فيتصدق به ويستغني به عن الناس

: خير له من أن يسأل رجلا أعطاه أو منعه ، ذلك بأن اليد العليا خير من اليد السفلى ،

وابدأ بمن تعول "

على فكرة... إن الآية الكريمة يجب أن تكون شعارا ً يعلق في غرفة المدرسين ..

وليس حجة لتسهيل عمليات النصب والاحتيال

فاعتبروا يا أولي الألباب ......
​

 

[عشتار]

ثم أين هم من قال تعالى عنهم :

{يَحْسَبُهُمُ الْجَاهِلُ أَغْنِيَاء مِنَ التَّعَفُّفِ تَعْرِفُهُم بِسِيمَاهُمْ لاَ يَسْأَلُونَ النَّاسَ إِلْحَافاً}


وعن عبيد بن عدي الخيار قال

«أخبرني رجلان أنهما أتيا النبي صلى الله عليه وسلم، وهو في حجة الوداع

وهو يقسم الصدقة فسألناه منها ، فرفع فينا النظر وخفضه فرآنا جلدين ( قويين )

و قال: «إن شئتما أعطيتكما ولا حظ فيها لغني ولا لقوي مكتسب»

رواه أبو داود والنسائي .
​

 

[موجة بحر]

للأسف هاد واقع مرير عنا
وخصوصا باستغلال الاطفال الصغار
حتى الاهالي بلا رحمة بيخلوا ولادهن يروحوا يشحدوا ويتركوا مدارسن ليتزهرموا المشروبات الروحية او يلعبوا قمار
وياما بتلاقيهن واقفين بطوابير قدام البنوك مشان يحطوا ايرادهن اليومي بحساباتهن
لك المصيبة انو اسلوبن فظيع بالنق والزق
ما بيحلو الا لحتى ياخدوا طلبهن ويخجلوك قدام الناس كلها
اساليب غريبة عجيبة
اخرها من كم يوم انا وبالمكتب بتجي وحدة بتقلي والله صعبان علي اطلب الي ح اطلبوا بس ابني بالمشفى وطالبين صورة لدماغو وكتير تعبان
ولازم صورها وبيتي بجبلة ومالي قادرة روح وارجع والله بكرة بجيبها وبعطيكي ياها
دين بس 2500 الله يخليكي معي 300 ليرة بس
اطلعت بشكلها ومنظرها مو منظر وحدة ابنها تعبان كل هاد اصلا يمكن الروحة والرجعة ما بتكلفها 100 ليرة بدال هالسؤال
اساليب غريبة عجيبة شي بشيب شعر الراس بالطريقة اللي بيخترعوها
طيب ما يفكروا بطريقة تانية ياخدوا فيها مصاري بدون سؤال حدن
موضوع متشعب جدا

​

 

[فرآشة الياسمين]

 

[mr_ops]

هاد هوو وضعنا.. مليانة الدنيا متسولين هون وهون .. والله يعين الجميع ..

وانا من رأيي انه المعاملة مع الله والمحتاج ما بيسأل .. في بالصالحية رجال اعمى .. بعلق على ايده عصايته وبيمسك بين ايديه علبة مسكة الي فيها حبتين .. وبيقعد بـ بيعها .. هاد الرجال صرله من وقت ما كنت صغير شوفه بالسوق ولهلء بشوفه .. انا قصدي انه المحتاج بينزل بيشتغل شو ما كان اقل شي بـ بيع مسكة بـ خمس ليرات او عشر ليرات ..

انا ساكن بالامارات .. مرة وانا بالمكتب بفوت عليي واحد لا بيسمع ولا بيحكي .. عطاني ورقة مكتوب فيها انا اصم وبحتاج لمساعدة .. عطيناه الي فيه النصيب خااااااااااصة اني عرفت انه من سوريا من حلب .. وقلتله لو بدك تسافر تعال بساعدك بالتذكرة ( من باب الشفقة بـ ابن بلدي .. ) وانا عم اعمله التذكرة اطلعت على الفيزا تبعه بتعرفوا شو لقيت مهنته ؟؟؟؟؟؟؟؟؟؟؟؟؟؟

تجارة عامة او تاجر ....

في حدا بيتخيل انه هاد المسكين الي جاية يطلب حسنة تاجر او يعني بيشتغل بالتجاااااااااارة !!!!!!!!!!!!!!

قسما بالله انقهرت من قلبي انه ساعدته وبالآخير طلع تاجر او شغله بالتجارة العالمة؟؟؟
وانا عم حاسبه عالتذكرة اجا ببالي آخد منه الي عطيته ياه وخاصة انه المبلغ ما كان بسيط (اصم وابن بلدي وبالغربة) .. بس بالآخير قلت لاء ما بجوز هيك اعمل ورب العالمين بحاااااسبه على الي عم بساويه ...

(ولو اني طولت بس صايرة معي كتير قصص)

اجاني واحد باكستاني عم يبيع مسابح .. طبعا النوعية عادية وبسيطة المسبحة .. قالي ساعدني واشتري مني مسبحة .. اطلعت هيك رجال كبير بالعمر وعم يلف ويدور مشان يبيع لحتى يبيع الي معه وياكل ... سبحان الله

بعتذر عالاطالة بس هدول اكتر تنين ضالين ببالي ...

وشكرا الك عشتار عالموضوع الي طرحتيه

 

[ابوغريب]

واما السائل فلا تنهر بس مو تريليون مرة ​

 

[- ]Safee[ -]

انا بما انو متل الكل هالموقف صاير معي ترليون مرة
فبطلت اعطي حدا
يعني بعمل حالي ماني سمعان وبطنش

​

 

[عشتار]

واما السائل فلا تنهر بس مو تريليون مرة ​

يا جماعة .. أكرر للمرة الثانية .. يجمع معظم المفسرين على أن المقصود بالآية الكريمة :

سائل العلم وليس سائل المال


شكرا ً للجميع على المساهمات المفيدة

كانت محاولة .. لنشر مقدار ضئيل من الوعي يحمينا من الوقوع ضحايا النصب والاحتيال

ربما .. وأقول ربما استطعنا أن نحد من هذه الظاهرة المشوهة


أصدقائي .. من يتسولون في شوارعنا ليسوا محتاجين بل نصابين

ولو لم يجدوا من ينخدع بهم لما استمروا في عملهم هذا

اعذروني على ما سأقوله لكنهم في قلوبهم ينادون :



من مال الله يا ... مغفلين




​

 

[White Pearl]

أصدقائي .. من يتسولون في شوارعنا ليسوا محتاجين بل نصابين

ولو لم يجدوا من ينخدع بهم لما استمروا في عملهم هذا

تمامااااا
لا ومو بس هيك
وعم يطبقو نظرية الشحاد ومشارط عاصولها
يعني حتى لو اتغابينا وعطيناهون عم يتمقرفو وبيطلعو بنظرة اشمئزاز
ومرة وحده جايه عم تطلب او بالاحرى عم تشحد مصاري
وحاطة بايدها 3 اساور دهب
انو بس بدي افهم ازا عنجد محتاجة مصاري لي ماتبيع اللي بايدها قبل ما تمدها للعالم وتشحد عليها

 

[Gabriel]

يا صديقتي
المحتاج الحقيقي والذي فعلياً ( ظلمته الحياة ) لا يرضى أن يمد يده للآخر
ولا يرضى أن يتخلى عن جزء صغير من كرامته والتي عادة ما يراها ثروته الوحيدة في هذا العالم
شكرا جزيلا لك

​

 

[آلبتول]

أنا ما يستفزني بهم أكثر عندما أجدهم يفرزون بكثرة في مواسم الأعياد والمناسبات الدينية ويستغلونها بالتسول
يشهون سمعة العيد وفرحتها ...أعتبرهم سفهاء من يبحث عن لقمة العيش بهذه الطريقة
​

 

[دموع الورد]

شكرا ً عشتار على هاد الموضوع الكثير كثير مهم

وهاي الظاهرة موجودة بكل العالم مو بس بسوريا

وفعلا انه كل اللي بكونو عم يشحدو اذا بحثنا عنهم منيح بكونو عنجد يمكن اغنى منا

ومتل ما حكى البعض انه المحتاج بالفعل لا يسمح او يرضى لكرامته ان يمد يده لأحد

وبيشتغل اي شي مشان ياكل ويعيش بكرامة

وانا كتير بتصير معي حتى مرة كنت انا وبنت عمي بالسوق وكل مرة كنت شوف فيها متسول او متسولة اشفق عليها وكون بدي اعطيها

قامت قلتلي بنت عمي اذا ضليتي على هالحال ما رح يضل بجيبتك ولا قرش لنو ما رح تلحقي عليهم


يسلمو حبيبتي
​

 

[الأمبراطور]

شكرا عشتار
الله يعطيكي العافية